Programi i Bursimit për Zhvillim Profesional të të Rinjve Shqiptar të Diplomuar.

Këshilli Kombëtar Shqiptar (KKSh) shpall Programin e Bursimit për Zhvillim Profesional për të rinjtë e diplomuar shqiptarë nga Presheva, Bujanoci, Medvegja dhe Sanxhaku. Ky program synon të fuqizojë të diplomuarit përmes përvojës praktike në institucione lokale, organizata të shoqërisë civile dhe ndërmarrje private në Preshevë, Bujanoc, Medvegjë dhe Novi Pazar, duke i ndihmuar ata të zhvillojnë aftësi profesionale, të fitojnë njohuri mbi pozitën dhe sfidat e komunitetit shqiptar në Luginë e Sanxhak, të krijojnë lidhje profesionale dhe të përgatiten për tregun e punës.

Programi zgjat 10 muaj dhe përfshin 90 praktikantë nga Presheva, Bujanoci, Medvegja dhe Novi Pazari, nga profile të ndryshme të diplomuarish me së paku 180 kredi ECTS(niveli Bachelor). Përveç praktikës, pjesëmarrësit do të ndjekin javën e orientimit, Akademinë Politike, si dhe programin e edukimit juridik mbi të drejtat e njeriut dhe të pakicave, sistemin politik dhe juridik.

Praktikantët do të përfitojnë kompensim mujor prej 500 euro bruto (në dinarë), mentorim profesional dhe mundësi për të realizuar projekte komunitare përmes Skemës së Granteve.

Secilit aplikant të përzgjedhur do t’i përcaktohet ndjekja e programit në institucionin që i përshtatet profilit të tij akademik.

Ky program përfaqëson një hap konkret drejt integrimit profesional të të rinjve shqiptarë, përgatitjes së tyre për sfidat që i presin dhe rritjes së përfaqësimit të tyre në institucionet publike dhe jetën shoqërore të Luginës së Preshevës dhe Sanxhakut.

Afati i fundit për aplikim është data 17.11.2025 ora 18:00.